" ఇంగ్లీషు లోన మ్యారేజి, హిందీ లో అర్థము షాది"

జగపతి పిక్చర్ నిర్మించిన   రెండవ చిత్రం 'ఆరాధన'.  1962 లో విడుదల.  నిర్మాత శ్రీ  V B రాజేంద్ర ప్రసాద్, దర్శకుడు శ్రీ V మధుసూదన్ రావు. సంగీతం శ్రీ సాలూరు రాజేశ్వర రావు. ఘంటసాల మాస్టారు, ఈ చిత్రంలో మూడు పాటలు పాడారు . ఒకటి నాయకుడు అక్కినేనికి ( నా హృదయంలో నిదురించే చెలి), మిగిలిన రెండు, శ్రీ రేలంగి కి.  ఈ చిత్రంలోని అన్ని పాటలు బహుళ ప్రజాదరణ పొందినవి.   ఘంటసాల -జానకి  పాడిన " ఇంగ్లీషు లోన మ్యారేజి, హిందీ లో అర్థము షాది" సరదాగా సాగిపోయే పాట.  గీత రచన ఆరుద్ర . ఆ పాట విని ఆనందించండి

"చేతిలో చెయ్యేసి చెప్పు బావ, చేసుకొన్న బాసలు చెదిరి పోదని".

జగపతి పిక్చర్స్ వారు నిర్మించిన చిత్రం 'దసరా బుల్లోడు'. నిర్మాత, దర్శకుడు శ్రీ V B రాజేంద్ర ప్రసాద్. విడుదల 13-01-1971. 
అప్పటివరకు కేవలం నిర్మాత గానే ఉంటూ వచ్చిన రాజేంద్ర ప్రసాద్ గారు ఈ చిత్రానికి దర్సకత్వం వహించి, చిత్రాన్ని సూపర్ డూపర్ విజయం చేసారు.  మామ మహదేవన్ అందించిన సంగీతం,  చిత్రాన్ని తారాపథంలో నిలపెట్టింది. పల్లె వాతావరణం, అక్కినేని పంచ కట్టు, హీరో కున్న బుల్లి కారు, వాణిశ్రీ హావ భావాలూ, చిత్రానికి వన్నె తెచ్చాయి. 
పాటలు, పాటల చిత్రీకరణ అమోఘంగా ఉండి , కుర్ర కారును, మహిళా ప్రేక్షకులను అమితంగా ఆకట్టుకుంది. ఆత్రేయ కలం నుండి  జారు వాలిన పాటలన్నీ మధురంగా ఉండి, ఘంటసాల గాత్రంలో అవి అజరామరంగా నిలిచిపోయింది. అలాంటి  పాటే,
"చేతిలో చెయ్యేసి చెప్పు బావ, చేసుకొన్న బాసలు చెదిరి పోదని".  ఆ   పాట  విందాము.\\
 వీడియో క్లిప్పింగ్ దొరక లేదు.   ఆడియో మాత్రమే ఉంది.

'తెల్ల చీర కట్టుకొన్నది ఎవరికోసము'

జగపతి పిక్చర్స్ పరంపరలో వచ్చిన 4వ చిత్రం "అంతస్తులు". చిత్ర దర్శకుడు శ్రీ V. మధుసూదన్ రావు, సంగీతం శ్రీ K V మహదేవన్. అక్కినేని,భానుమతి, కృష్ణకుమారి, గుమ్మడి, జగ్గయ్య, రేలంగి, రమణా రెడ్డి నటించిన చిత్రం, మంచి ప్రజాదరణ పొందింది.  పాటలన్నీ బాగున్నాయి. ఘంటసాల సుశీల గారలు పాడిన 'తెల్ల చీర కట్టుకొన్నది ఎవరికోసము' సూపర్ హిట్ పాట.  రచన శ్రీ ఆత్రేయ.  ఆ పాట విందాము. 

'దేవ దేవ ధవలాచల మందిర గంగాధర హర హర నమో నమో'

 

ఈ రోజు మహాశివరాత్రి. శివుని మీద ఘంటసాల మాస్టారు ఎన్నో పాటలు పాడారు. భక్తి పాటలంటే మాస్టారు పాడినవే వినాలి, అంత రక్తిగా ఉంటుంది. బహుశా నేడు కైలాసంలో మహాశివుడు, ఘంటసాల గారితో పాటలు పాడించుకుంటూ, నాట్యం చేస్తున్నాడేమో.  మనం కూడా, శివుని మీద పాట విందాం. " భూకైలాస్" చిత్రం లోని 
'దేవ దేవ ధవలాచల మందిర గంగాధర హర హర నమో నమో' పాట  విని తరిద్దాం.  గీత రచన: సముద్రాల, సంగీతం R గోవర్ధన్, సుదర్శన్.

" ఓ తోడు లేని చెల్లీ , పగ పూనె పాత సంఘం, "

శ్రీ సారథి స్టూడియోస్ నిర్మించిన చిత్రం ' కుంకుమ రేఖ'.. ఈ చిత్రం 1960 లో విడుదల. చిత్ర దర్శకుడు శ్రీ తాపి చాణక్య, సంగీతం శ్రీ మాస్టర్ వేణు. ఇందులో ఘంటసాల మాస్టారు పాడిన " ఓ  తోడు లేని చెల్లీ , పగ పూనె  పాత సంఘం, నీ తాళి  తెగిన నాడే ఎగతాళి నీకు శాపం "  తెర వెనుక పాట. సావిత్రి మీద చిత్రీకరణ. చాలా అరుదుగా వినిపించే పాట.  ఈ పాట వింటూ ఉంటె, 1955 లో వచ్చిన " ఉడన్ ఖటోల" చిత్రంలోని "ఓ దూర్ కె ముసాఫిర్, హమ్ కో భి సాత్ లేలే" పాట గుర్తుకు వస్తుంది. 

" తీరేనుగా నేటితోనే తీయని గాధ, మిగిలిపోయే (మా) మధిలో మాయని బాధ"

 అక్కినేని ఇంక లేరు అన్న వార్త విని, మనసు ద్రవించింది. ఒక మహా నటుడే కాక, ఒక  మహా మనీషి.  ఆయన ఎక్కని మెట్టు లేదు. రాని బిరుదు లేదు. ఉన్నత శిఖరాలు అధిరోహించిన మానవతా వాది. ఆయన మహాభి నిష్క్రమణ చేసారు. ఆయన కు శాంతి చేకూరాలని, వారి కుటుంబ సభ్యులకు వారు లేని లోటును భరించే శక్తి ఇవ్వాలని ఆ భగవంతున్ని మనసారా  వేడుకొంటున్నాను. 
ఆయన నిష్క్రమణకు సంభందించిన పాట, 'పెళ్ళికానుక' చిత్రంలోని 
" తీరేనుగా నేటితోనే తీయని గాధ, మిగిలిపోయే (మా) మధిలో మాయని బాధ" పాట విందాము. మనసు ద్రవించక మానదు. 

 

"ఆడవాళ్ళ కోపంలో అందమున్నది, అహ.. అందులోనే అంతులేని అర్థమున్నది".

 
అన్నపూర్ణ పిక్చర్స్ చిత్రం "చదువుకున్న అమ్మాయిలు". ఈ చిత్రం 10-04-1963 లో విడుదల అయ్యింది. అక్కినేని, సావిత్రి, కృష్ణకుమారి. శోభన్ బాబు, సరోజ, మొదలగు వారు నటించారు. ఆదుర్తి సుబ్బారావు గారు దర్శకుడు. శ్రీ సాలూరు రాజేశ్వర రావు గారు సంగీతం సమకూర్చారు. ఈ  చిత్రానికి  మూలం  డాక్టర్ శ్రీదేవి నవల "కాలాతీత వ్యక్తులు".  మంచి కథ, మంచి సంగీతం ఉన్న చిత్రాలు తీయడం అన్నపూర్ణ పిక్చర్స్ ప్రత్యేకత. అన్ని పాటలు బహుళ ప్రజాధరణ పొందినవే. ఘంటసాల మాస్టారు సుశీల తో పాడిన
"ఆడవాళ్ళ కోపంలో అందమున్నది,  అహ......  అందులోనే అంతులేని అర్థమున్నది". పాట ఎంతో హాయిగా ఉండి, మనసును ఆహ్లాద పరుస్తుంది.   ఆ పాట విందాము. పాట క్లిప్పింగ్ యు ట్యూబ్ ద్వారా సేకరించడం జరిగింది. వారికి   నా ధన్యవాదాలు